Headlines
Published On:Selasa, 01 Februari 2011
Posted by AchiyaK Deni

Pasambahan Anak Mudo : Juaro ka Tangah

Written by R. St. Tandiko dan M.I. St. Rajo Batuah
Tuesday, 12 April 2005

Sipangka : Sutan Palindih
Sialek : Sutan Mantari

Sipangka :
- Niniak Mamak hambo nan gadang Basa batuah, gadang babingkah tanah kabasaran salingka aua, tuah malingkuang Minangkabau, bari maaf hambo dalam buah pasambahan.
- Suluah bendang alim ulama, ahli akal cadiak pandai, rilah jo maaf hambo pintak.
- Nan mudo manih bakato, duduak sahamparan tagak saedaran, rilah jo maaf hambo mintak.
- Juaro silek, pasambahan tibo bakeh Juaro !



Sialek :
Sambah di Allah, manitahlah Sutan.

Sipangka :
Sungguahpun Sutan saurang bakeh hambo manibokan salam jo buah pasambahan, nak sarapeknyolah niniak mamak, sifat tarhalia ateh rumah nangko, usah kadibilang kadiatap gala, sambah sajo dimuliakan, pambilang paatap gala, laikoh tampat samparono sambah tibo bakeh Sutan ?

Sialek :
Sambah di Allah, manitahlah Sutan.

Sipangka :
Sambah nan hambo tibokan, titah nan hambo antakan, jadi papatah dinan tuo, manjadi undang di nan cadiak, ibarat kito anak mudo :
Takilek kapa dari sawang
Kapa nan datang dari muaro
Kapa nan hilia jo kamudiak
Sarek muatan kain putiah
Nahkhodoh tagak diateh tiang
Lalu malompek ka sikoci
Maagak di hari nan kapatang
Iyo baturuik dek juaro
Mambawo sirieh nan sacabiak
Ka hadapan niniak dengan mamak
Sarato amai dengan bapak
Nak mahadiri pakarajaan ini

Pun baatoh hanyo lai,
Tinggi karambia nan sabatang
Pucuak dikanduang awan mega
Disakah anak bidodari
Disakah lalu dibawonyo,
Kok nan hilia alah datang
Nan di mudiak alah tibo
Nan dakek datang mananti
Sakarang alah badiri.

Limbak nan daripado itu, maagak di nan hari sahari nangko, kok janjang alah batingkek banduo alah batapuak, duduak lah banamo sahamparan tagak banamo saedaran, manimbang sapanjang adat mangaji sapanjang alua, alah ciek jo duo, duo jo tigo alah banamo basalasai, iyo juo bak undang dalam pasambahan :
Babunyi tarompet di mahligai
Gandang dipalu jo cumati
Dipalu sajo di tangah-tangah
Takajuik buruang di udaro
Itu parentah rajo kito
Saf banamo apek, ririk banamo tigo, kaduduakna niniak dengan mamak, sarato karib dengan kabieh, kini juaro nak ka tangah, manampuah ririk katigonyo, kok ado tahadap tabalakangi, disusun jari nan sapuluah, ditakuakan kapalo nan satu, rilah jo maaf hambo pintak, adat baitu dahulunyo, sakian sambah tibo kahadapan Sutan.

Sialek :
Sampai … Sutan ?
- inyiak datuak Sati, bari maaf hambo jo buah panitahan.
- Inyiak Datuak Marajo, bari maaf hambo dalam buah pasambahan.’
- Inyiak datuak Bagindo bari maaf hambo jo buah pasambahan, sarapeknyolah niniak mamak hambo, ka pai tampek batanyo ka pulang tampek babarito, bari maaf hambo dalam buah pasambahan, sado sifat tarhalia ateh rumah nangko.

Iyo ma … Sutan, sambah kumbali bakeh Sutan, bagi lah Sutan saurang bakeh hambo mangumbalikan salam jo buah pasambahan, nak sarapeknyolah niniak jo mamak, sifat tarhalia ateh rumah nangko, iyo jadi papatah dinan tuo, menjadi undang dinan mudo.
Apolah ibarat kato dinan mudo :
Tarantang suto di Kinamat
Dicalut nak rang Ampang Gadang
Anjalai badarai-darai
Badarai ka dalam padi
Talatak ateh pamatang
Sunat kato dek baulang
Pasa jalan deka batampuah
Kawi kato adat lazim kato syarak
Buah panitahan Sutan dianjuang tinggi diamba gadang
Apolah nan jadi buah panitahan Sutan cako,
Bukan carano nan balariak
Dilariak Sutan Bagindo
Di papan ado talatak
Di Padang di Indogiri
Dai rumah Juaro Mudo
Maagak di hari nan kapatang
Iyo baturuik dek juaro
Mambawo sirieh nan bacabiak
Mambawo rokok nan sabatang
Ka hadapan niniak dengan mamak
Sarato karib jo kabiah, ipar jo bisan,
Nak mahadiri pakarajaan nangko.

Pun baatoh janyo lai :
Sikukuik babaju balang
Si Santi babaju suto
Nan dituruik alah datang
Nan dinanti alah tibo.

Maagak hari nan sahari nangko, adat bakarib bakabiah, baipar babisan, jauh nan dijalang hampia nan dituruik, janjang batingkek bandua batapuak, duduak sahamparan tagak saedaran, mandanga patuturan baliau ciek jo duo, manimbang sapanjang adat mangaji sapanjang alua, alah ciek jo duo, duo jo tigo, alah banamo basalasai.
Iyo juo di jambo bak basiang, diganja bak batanam, diulang jajak ditikam kiri, lambak tampuruang lago anam, ditariak tigo tingga tigo, bilangan sakitu juo.
Apolah nan jadi buah panitahan sek Sutan cako :
Calindik nan rang Ampek Angkek
Tapauik di ujuang guguak
Badariang mangko babunyi.
Ririk banamo tigo, kaduduakan niniak mamak dengan mamak, sarato karib dengan kabiah, kini juaro nak ka tangah, manampuah ririk katigonyo, koko ado tahadap tabalakangi, disusun jari nan sapuluah, ditakuakan kapalo nan satu, rilah jo maaf hambo pintak, adat baitu dahulunyo, kan baitu bana buah panitahan Sutan ?

Sipangka :
Iyo bana.

Sialek :
Iyo ma … Sutan, sapanjang buah panitahan Sutan bakeh hambo nan ka tangah, kito nan bahadap bahadang batunggalan alah baraso bakabatulan, niniak jo mamak lai duduak bahadapan, suluah bendang alim ulama, ahli akal cadiak pandai, nan mudo manih bakato, itu nan duduak samo sahamparan tagak samo saedaran, hambo bawo kato jo mupakat, laikoh dalam adat nan bapakai dalam cupak nan baisi, nan baitu sutan ?

Sipangka :
Sampai … Sutan ? Sapanjang buah panitahan Sutan nan ka tangah, alah dalam adat nan bapakai, dalam cupak nan baisi, tapi sungguahpun baitu, niniak jo mamak lai duduak bahadapan, suluah bendang alim ulama, ahli akal cadiak pandai, nan mudao manih bakato, itu nan duduak samo sahamparan tagak samo saedaran, hambo bawo kato jo mupakat, laikoh dalam adat nan bapakai dalam cupak nan baisi, kan baitu bana buah panitahan Sutan ?

Sialek :
Iyo bana.

Sipangka :
Tibonyo lah dalam adat nan bapakai, dalam cupak nan baisi, kato dibawo jo mupakat Sutan.

Sialek :
Iyo ma .. Sutan, nan kato alah dalam adat nan bapakai, dalam limbago nan batuang, kato hambo bawo jo mupakat, saba mananti malah Sutan.

Ninik mamak membawa kata mupakat, kemudian sialek mengembalikan persembahan.

Sarato karib dengan kabiah. Apolah nan jadi buah barinyo dek baliau bakeh hambo, di hambo ma antakan ka hadapan Sutan, iyo juo bak undang dalam pasambahan :

Buruang banamo Reno Ali
Mancotok anak barabah
Mangaja anak mantilau
Lah lamo adat nagari
Elok pusako dek nan tuo
Manantang juaro nak ka tangah
Lalulah kato baliau

Sipangka :
Sampai … Sutan ? Di hari nan cako hambo saba jo panitahan, Sutan marenjeng kato jo mupakat, ka hadapan niniak dengan mamak.
Apolah nan jadi buah barinyo dek baliau bakeh Sutan, dek Sutan maantakan bakeh hambo, sapanjang parmintaan hambo nan ka tangah :

Buruang banamo Reno Ali
Mancotok anak barabah
Mangaja anak mantilau
Lah lamo adat nagari
Elok pusako dek nan tuo
Manantang juaro nak ka tangah
Lalulah kato baliau
Kan baitu bana buah panitahan Sutan ?

Sialek :
Iyo bana.

Sipangka :
Iyo ma … Sutan, kok itu … iyo tu, dijapuik sapatah lai :

Jariau kayunyo lampai
Kok balah jan disibiah
Kok patah ganti jo basi
Mahimbau hambo lah sampai

Bakandak hambo lah buliah
Lah rancak kito baranti, Sutan ?

Sialek :
Sampai… Sutan ? Kok iyo … rancak tu, Sutan.
Dibaleh sapatah lai, apolah ka pambalehnyo.

Barabah tabang ka Tiku
Maraok ka dalam padi
Di padi mulonyo makan
Pintak basamo buliah
Kahandak samo balaku
Rancak baranti kito, Sutan

Sipangka :
Sampai … Sutan ? dangakan pulo ciek lai :

Tikuku balam di sangka
Mararau panjang katitiran
Sakitu baru nan takana
Nan lupo untuak kamudian
Lah rancak kito simpani.

Sialek :
Sampai … Sutan ? Pusako nan bajawab, pusako gayuang nan batangkih, jawabnyo sajo hambo adokan, laikoh bana na baitu, Sutan ?

Sipangka :
Kok itu alah bana.

Sialek :
Jawabnyo pulo dari hambo :

Bagalang-galang perak
Bacincin patah sambilan
Ka kalah ka manang tidak
Sadang rancak kito hantikan

Sipangka :
Kok itu babateh kito, Sutan.



-oOo-

Sumber : Sumarak Nagari : Alur, Pasambahan dan Pidato Adat Minangkabau
Disadur Oleh : Erwin Moechtar


Sumber : http://www.cimbuak.net

Klik Bintang Untuk Voting Anda
Rating: 4.5
Description: Pasambahan Anak Mudo : Juaro ka Tangah
Reviewer: AchiyaK Deni
ItemReviewed: Pasambahan Anak Mudo : Juaro ka Tangah


About the Author

Posted by AchiyaK Deni on Selasa, Februari 01, 2011. Filed under , . You can follow any responses to this entry through the RSS 2.0. Feel free to leave a response

By AchiyaK Deni on Selasa, Februari 01, 2011. Filed under , . Follow any responses to the RSS 2.0. Leave a response

0 comments for "Pasambahan Anak Mudo : Juaro ka Tangah"

Posting Komentar
Latest Posts :

Hotel

Kuliner

Wisata

Artikel Lainnya » » More on this category » Artikel Lainnya » »

Musik

Tari

Ukiran

Artikel Lainnya » » Artikel Lainnya » » Artikel Lainnya » »

Top Post

Coment

Adat

Artikel Lainnya»

Budaya

Artikel Lainnya »

Sejarah

Artikel Lainnya »

Tradisi

Artikel Lainnya »

Di Likee "Yaaa.." Kalau Postingan Di sini Sangat Bermanfaat Dan Membantu bagi Anda ..

VISITORNEW POST
PageRank Checker pingoat_13.gif pagerank searchengine optimization Search Engine Genie Promotion Widget ip free counter