Pidato Baleha (1)

Written by R. St. Tandiko dan M.I. St. Rajo Batuah
Monday, 19 February 2007

Image

Anau ketek anau lurah
Diumbuak diumbi jangan
Hambo mudo tagak manyambah
Diupek dipuji jangan

Ayam hitam pandai baranang
Kaki nan dapek dek buayo
Duduaklah niniak dinan tanang
Nan tagak hambo pidato






Aka banamo aka cambai
Cindai diambiak ka basahan
Bukannyo hambo cadiak padai
Adat pidato disambahkan

Balayie kapa ka nagari
Balayie sampai ka lautan
Rajo mamandang bahadapan
Heranlah puti dek mancaliak

Hambo mancurai mamaparkan
Jadi pitaruah dek nan tuo
Jadi pitaruah dek nan cadiak

Apolah nan jadi pitaruah dek nan tuo, pituah dek nan cadiak, tak kalo nagari ka di huni, dibuek kato parbuatan. Apolah nan jadi kato parbuatan, picak samo ka ditapiak, Bulek samo ka digiliang.
Lah bulek kato parbuatan, bulek lah buliah digolekkan, picak lahbuliah dilayangkan, saitiak sa ayam, sasanak sa kamanakan, anak satu kamanakan surang, kampuang lah baompok nagari lah babanja.
Apokoh tando dalam kampuang, rumah tangga sawah dengan ladang, kampuang jo halaman. Apokoh tando dalam nagari, badiri balai jo musajik, jikok balainyo di nagari, iyolah kaduduakkan urang nan ampek jinih, mamagang jabatan masiang-masiang, aratinyo urang nan ampek jinih, manuruik pandapatan kito sajo, iyolah imam dengan khatib, sarato manti dubalang, iyo panghulu dalam nagari.
Jikok imam dengan khatib, malam rintang dengan kitab, siang hari rintang bapituah. Adopun manti di nagari, haluih akal laut bicaro, tahu di pundak kadahan kamancamuak, tahu di batang ka malintang, mambuhua tidak mambuku, mauleh tidak mangasan, di atok langik jo bicaro, bumi nan tidak katirisan, pisau ketek haluih mato, pangabuang batang malintang.
Jikok dubalang di nagari, namuah basusah jo bapayah, tahu di parik nan lah tahampa, ranjau nan lah lapuak, namuah batuhuak jo baparang, namuah bakuah-kuah darah, malam basalimuik ambun, siang basalendang paneh, tak kurang sinjato tajam, tahan sapik dengan guntiang, tahan gurindam garagaji, nan kareh ditakiaknyo, nan jauah nan ka dijapuik, jikok tak basuo nan bak kian, bapantang babaliak pulang, manungkuik inyo ka bumi, manangadah inyo ka langik, badan nan tangkeh dari kilek, karehlah pulo dari basi, sirah mato di galanggang, tabusuang dado dinan rami, namun bana baasak tidak, takuik di adat nan ka rusak, takuik agamo takkan kokoh, susah parentah takkan maju, banang sahalai bapilin tigo, cinto kapado tanah air.
Adopun panghulu di nagari, pusek jalo pumpunan tali, balayie manantang pulau, bajalan manantang bateh, bakato manuju bana, ameh batuah tahan uji, bungka ganok tahan cubo, carano panuah pantang bapalieng.

Payakumbuah baladang kunyik
Di kida jalan ka Kuantan
Tak namuah kuniang dek kunyik
Tak namuah lamak dek santan
Mamacik kato nan bana

Tasijolok jajak manurun
Tatukiek jajak mandaki
Adat jo syarak kok tasusun
Rakyat sanang padi manjadi

Mangkuak joro pingganyo jorong
Sabuah barisi nasi
Sambah hambo jiko tasorong
Niniak jo mamak mambaiki

Kalalawa di pulau Rimbang
Anak ruso mati badabiah
Kalau salah buliah ditimang
Badoso ampun nan labiah
Antahlah hambo mandatangkan sambah.

Sumber : Sumarak Nagari - Alur, Pasambahan dan Pidato Adat Minangkabau
Disadur Oleh : Erwin Moechtar


Sumber : http://www.cimbuak.net