Headlines
Published On:Selasa, 01 Februari 2011
Posted by AchiyaK Deni

Alur Adat Ka Tangah

Written by R. St. Tandiko dan M.I. St. Rajo Batuah
Friday, 02 June 2006
Sipangka :
datuak Palimo, pasambahan tibo di bakeh Datuak, sungguahpun Datuak nan disambah, nak sarapeknyolah niniak jo mamak, amai jo bapak, sifat tarhalia ateh rumah nangko.
Usah ka dibilang kadiatap gala, aratinyo sambah sajo dimuliakan, ka pambilang paatap gala, laikoh tampat samparono sambah tibo ka bakeh Datuak ?
Sambah na hambo tibokan, titah nan hambo antakan ka hadapan Datuak,maagak di kami di maso nan dahulu, mako dibawolah amai jo bapak, sarato kami dunsanak, mancari kato jo mupakat.



Sakarang alah dapek kato jo mupakat, Bulek kato jo saukuran, bulek lah buliah digolekkan, picak lah buliah dilayangkan. Adopun di hari nan sahari nangko, janjang batingkek bandua batapuak, duduak sahamparan tagak saedaran, manimbang sapanjang adat mangaji sapanjang alua, alah banamo basalasai, sungguahpun baraso basalasai, jalan nan duo tarantang, satu jalan syarak, kaduo jalan adat. Baapo nan sapanjang syarak, alah samparono bapati jo doa di surau, di hadapan imam dengan khatib, sarato bilal maulana, di hadapan saksi jo sahadah.
Baapo pulo nan sapanjang adat, tardiri di rumah tanggo, kampuang jo halaman, di hadapan niniak jo mamak, sarato karib jo kabiah, cuma lai sapanjang adat kami ka tangah, kain nan balipek pitih nan babilang, mintak di tarimo suko, dilakukan ka hadapan niniak jo mamak, sarato amai dengan bapak, baliau nan ka ampek suku, sakian sambah diantakan ka hadapan Datuak.
Sialek :
Sampai … Datuak ? Ma Datuak Bagindo, sunat kato dek baulang pasa jalan dek batampuah, buah panitahan Datuak nan ka hambo ulang.
Apolah nan manjadi buah panitahan Datuak cako, sambah manyambah dipulangkan kapado Allah, kato sajo dipakatokan. Apolah nan manjadi buah kato kapado hambo, maagak di hari maso dahulu, mangko dibawolah niniak jo mamak, amai jo bapak, mancari kato jo mupakat, mambulekkan paukuran, bulek lah buliah digolekkan, picak lah buliah dilayangkan.

Adopun di hari nan cako, janjang batingkek bandua batapuak, duduak sahamparan tagak saedaran, menimbang sapanjang adat mangaji sapanjang alua, alah ciek jo duo, duo jo tigo, alah banamo basalasai. Kini tumbuah nan banyak tabik nan bak padi, tabik di silang nan bapangka, karakok nan bajunjuang, jalan duo nan tarantang.

Satu jalan syarak, tardiri di musajik dalam nagari, di hadapan imam dengan khatib, sarato bilal maulana, di hadapan wali jo sahadah.
Baapo nan sapanjang adat, tardiri di rumah tanggo, kampuang jo halaman, di hadapan karib jo kabiah, niniak jo mamak, sarato ibu dengan bapak.

Tantang adat kami nan ka tangah, kain nan balipek pitih nan babilang, nak minta ditarimo, dilakukan ka hadapan baliau niniak jo mamak, sarato amai dengan bapak, dan baliau nan ka ampek suku, kan baitu bana lalunyo buah panitahan, Datuak ?

Sipangka :
Iyo bana.

Sialek :
Ma … Datuak Bagindo, sapanjang buah panitahan Datuak nan katangah, kato surang dibulek-i kato basamo dimupakati, hambo bawo kato jo mupakat, saba Datuak jo panitahan, laikoh dalam adat nan bapakai, dalam cupak nan baisi, nan baitu Datuak ?

Sipangka :
Sampai … Datuak ? Tibonyo alah dalam adat lamo pusako usang, kato dibawo jo mupakat, Datuak.

Sialek :
Kok baitu saba mananti, Datuak

Sipangka :
Hambo mananti sakiro-kiro.

Datuak Palimo membawa kata mupakat dengan ninik mamak dan semua yang patut, kemudian mengembalikan rundingan itu kepada Datuak Bagindo.

Sialek :
Ma … Datuak Bagindo, di hari nan cako Datuak saba jo panitahan, hambo mambawo kato jo mupakat, jo nan duduak sahamparan tagak saedaran, sarato amai bapak ka ampek suku.
Tantang adat nan katangah, lah sarek jo pusako, lah rindiah jo pakaian, lah taracak di kudo nyo, alah batarimo suko di baliau sapanjang adat itulah bana nan hambo antakan bakeh Datuak.

Sipangka :
Sampai … Datuak ? Sapanjang buah panitahan Datuak bakeh hambo, dihari nan cako hambo saba jo panitahan, Datuak marenjeng kato jo mupakat, picak nan satapiak bulek nan sagiliang, adat nan sapakai, ka ateh lah lamo sapucuak, ka bawah lah samo saurek, alah batarimo suko di baliau sapanjang adat, kan baitu bana buah panitahan, Datuak ?

Sialek :
Iyo bana.

Sipangka :
Iyo ma … Datuak, sabuah pintak alah buliah kahandak alah balaku, lah sanang kironyo hati Datuak.

Sialek :
Ma … Datuak Bagindo, dahulu kato basitinah, kamudian kato basicapek, capek tibonyo bakeh Datuak. Kacapekkan tibonyo bakeh Datuak, maagak parundiangan kito cako, alah ciek jo duo, duo jo tigo, alah banamo basalasai.
Tantang adat nan katangah, alah sarek jo pusako, rindiah jo pakaian, taracak di kudonyo tatampuah dijalannyo, alah batarimo suko sapanjang adat.

Tapi sungguahpun baitu, amai jo bapak rumik mainsuik, tagak rumik marenjeng, tantang dari pado maasak, iyo manyarayo kapado anak mudo Datuak, itu bana nan hambo antakan bakeh Datuak.

Sipangka :
Sampai … Datuak ? Sapanjang buah panitahan Datuak bakeh hambo, manih bak raso tangguli lamak bak raso santan, tapi sungguahpun baitu, hambo bawo kato jo mupakat, jo nan duduak nan sahamparan tagak saedaran, saba Datuak jo panitahan.

Sipangka :
Sampai … Datuak ? Hambo mananti sakiro-kiro.

Datuak Bagindo membawa kata mupakat dan kemudian mengembalikan rundingan itu kepada Datuak Palimo.

Sipangka :
Ma … datuak Palimo, di hari nan cako Datuak saba jo panitahan, hambo mambawo kato jo mupakat, picak nan satapiak bulek nan sagiliang, adat nan sapakai, bulek nan buliah digolekkan, picak nan buliah dilayangkan, amai jo bapak nangko dijapuik dijangkau, dimasuakkan ka Biliak nan dalam, kunci nan taguah buhua nan arek, tampaik baliau balarang bapantangan, agak rumik kami manampuah, itulah bana nan hambo antakan bakeh Datuak.

Sialek :
Sampai … Datuak ? Sapanjang buah panitahan Datuak nan katangah, nan baukua nan bajangko, nan babarih nan babalabeh, sabarih indak namuah hilang satitiak indak namuah lipua, dalam adat lamo pusako usang.
Tapi sungguahpun baitu, nan elok kato baiyo, nan bana kato baukua, hambo bawo kato jo mupakat, saba Datuak jo panitahan.

Sipangka :
Sakiro-kiro

Datuak Palimo membawa kata mupakat

Sialek :
Iyo ma .. Datuak, di hari nan cako hambo mambawo kato jo mupakat, Datuak saba jo panitahan, dapeklah kato jo mupakat, bulek nan sagolek picak nan salayang, adat nan sapakai, amai jo bapak nangko iyo bajapuik bajangkau, bamasuakkan ka dalam biliak nan dalam, kunci nan taguah buhua nan arek, tampaik baliau balarang bapantangan, basuluah matohari, bagalanggang mato nan banyak.
Tapi habih adat jo karilahan, habih cupak jo pusako, nan sakali nangko rilah jo maaf, itu bana nan hambo antakan bakeh Datuak.

Sipangka :
Sampai … Datuak ? Ka ateh lah samo sapucuak, ka bawah lah samo saurek, nan kito baapo, Datuak ?

Sialek :
Nan kito elok babateh.


Sumber : Sumarak Nagari - Alur, Pasambahan dan Pidato Adat Minangkabau
Disadur Oleh : Erwin Moechtar


Sumber : http://www.cimbuak.net

Klik Bintang Untuk Voting Anda
Rating: 4.5
Description: Alur Adat Ka Tangah
Reviewer: AchiyaK Deni
ItemReviewed: Alur Adat Ka Tangah


About the Author

Posted by AchiyaK Deni on Selasa, Februari 01, 2011. Filed under . You can follow any responses to this entry through the RSS 2.0. Feel free to leave a response

By AchiyaK Deni on Selasa, Februari 01, 2011. Filed under . Follow any responses to the RSS 2.0. Leave a response

Latest Posts :

Hotel

Kuliner

Wisata

Artikel Lainnya » » More on this category » Artikel Lainnya » »

Musik

Tari

Ukiran

Artikel Lainnya » » Artikel Lainnya » » Artikel Lainnya » »

Top Post

Coment

Adat

Artikel Lainnya»

Budaya

Artikel Lainnya »

Sejarah

Artikel Lainnya »

Tradisi

Artikel Lainnya »

Di Likee "Yaaa.." Kalau Postingan Di sini Sangat Bermanfaat Dan Membantu bagi Anda ..

VISITORNEW POST
PageRank Checker pingoat_13.gif pagerank searchengine optimization Search Engine Genie Promotion Widget ip free counter