Surek Dari Kampuang (1) : Lah Lupo

Ditulis oleh Yanto Jambak Kamis, 18 Februari 2010 20:05


Nan kanduang dagang dirantau
Jaweklah pasan ranah tapian
Kami kok indak ka dagang silau
Surek sapucuak toloang layangkan

Kirimkan kami surek sapucuak
Elok jo buruak di baritokan
Rusuah nak samo kito pujuak
Gamang nak samo di rasokan

Batanyo urang bakeh kami
Apolah rundiang ka kami jawab
Saribu sasa dalam hati
Dagang bangih indak basabab

Manuruik carito kaba buruang
Daganglah banyak salah jalan
Bujang banyak ditangkok binguang
Gadih lah banyak nan hilang pidoman

Kok batua nan tajadi
Mungkin dagang malulua sumpah
Lah hilang cahayo matohari
Kiamat nagari Rasulullah

Kami lapeh dagang bajalan
Bukan doh untuak marantau cino
Mancari ilmu jo pangalaman
Mambangun kampuang jo pusako

Tapi kini apo disabuik
Balain tasuo jo nan di cinto
Layangan putuih bananglah kusuik
Kumpalan apo lai gunonyo

Kami tak harok jo pakirim
Asa batamu kamilah sanang
Ka panjago silaturrahim
Pamupuak kasih jo sayang

Tapi kini apo di baco
Kaba indak baritopun indak
Surek sapucuak haram tibo
Lah hilang rindu jo taragak

Jalan salangkah lupo suruik
Dek lamak lenggok malenggang
Gilo dek rayu rumpuik saruik
Sirieh mawa layue di batang

Dagang lah mabuak jo kiambang
Di kampuang mawa lah jadi karisiek
Manangih lasuang di pintu kandang
Kinantan tabang tak babaliak

Padi taserak lah jadi salibu
Jaguang di kaka lah ba urek
Banang lawah manutuik pintu
Kandang lapuak sangkak lah ruek

Surau langang balailah sunyi
Lah hilang lagu dek badendang
Tapian indak sumarak lai
Ayie janieh ikan mahilang

Labuah luruih kini manyimpang
ulah di aliah urang lalu
Cupak di tuka rang padagang
Lah abih galeh baru tau

Pinang mudo layua dibatang
arai mayang manyasak kulik
Sadah masiek gambielah jalang
Carano lah jadi barang antic

Tamanuang pinyaram jo kalamai
Ajik maratok di kuali
Tak mungkin lai badan tapakai
baralek gadang lah jarang kini

Antah ka jadi ka buah tangan
Panyanangan hati rang di jao
Elok katiko sadang makan
Kanyanglah lupo dima asanyo

Manyasa puluik jadi katan
Urang bakandak bareh ampiang
Angek pariuak lah di tahan
Urang manulak masuak piriang

Lai bana badan tapakai
Indak labieh ka kawan kopi
Ta onggok duduak dalam kadai
Manunggu urang minum pagi

Dimakan urang sambie galak
Ma ota sambie bagarah
Lai bana mangatokan lamak
Di harago bakandak murah

ratok kok lai dagang simak
Himbau kok lai basahuti
Pintak kami indak doh banyak
Pulang kampuang janguaklah nagari

Tatumpah kasieh di jao
Sayang jo kami usah lupokan
Usah turuikkan pandangan mato
Kato bathin cubo dangakan

Condoang ka nan rancak pandangan mato
Condoang salero ka nan lamak
Kalau lah syetan nan mandayo
Kadang tubo tasangko ubek

Itu di kami nan marusuah
Dagang kok mabuak jo kiambang
Mukasuik mahapuih paluah
Palak lapeh gata nan datang

Ingek ingek sabalun kanai
Bakulimek sabalun abih
pinjaik dapek kapak tagadai
Kok batuka galak jo tangih

Kok nyampang surek indak babaleh
Kaba kok indak datang juo
Isi mukasuik kok kurang jaleh
Dangakan sajo surek ka duo…

Sumber :website Cimbuak.net