Kato Pusako (2)Tambo Minangkabau

Ditulis oleh A.B. Dt. Majo Indo Rabu, 08 April 2009 16:57

Adopun katiko langik takambang
Juo katiko mulai bumi tahampa
Katiko nabi Adam mulai kaditampo
Allah Ta'ala lah sudah manantukan
Anak cucu Adam nan mahuni dunie
Anak Adam nan bungsu manjadi rajo

Adopun anak Nabi Adam 'alaihissalam
Tigo puluah sambilan banyaknyo
Nikah ba antaro satu anak ka satu anak
Anak nan bungsu indak mandapek jodoh
Dilarikan malaikaik ka awang gumawang
Mako heranlah Adam jo Hawa anak baranak

Mako batiuiklah angin dari sarugo
Diguguah gandang si Rajo Nobaik
Ditiuik sarunai si Randang Kacang
Dibunyikan pulo rabab jo kucapi
Dikambangkan pulo payuang ubua ubua
Mako manari narilah anak bidodari
Takajuk maliek anak Adam nan bungsu
Basamo malekaik di awang gumawang

Marebak harum haruman didalam sarugo
Turun malekaik di langik nan katujuah
Mako baguncang kayu sidratul muntaha
Tabukak pulolah pintu baitul makmur
Sagalo malekaik manamui anak Adam nan bungsu
Basamo samo mambimbiang jo mamapahnyo
Adam sakaluarga mamandang ka awang gumawang
Nampak anak nan bungsu mamakai tanduak
Batanduak dinamokan ameh sajati jati
Takuik Adam anak baranak malieknyo
Tadanga pulo suaro dari puncak bukik Kaf
Mamandang Adam anak baranak kabukiktu
Nampak panji panji dikabang diateh bukik
Bantuak ombak dilauik mamutuiah ruponyo
Mako heranlah Adam jo Hawa anak baranak

Mako mando'a Adam pado Allah Rabbul'alamin
Mintak dipatamukan juo jo anak cucunyo
Mako Allah Ta'ala manurunkannyo ka dunie
Mako tajadilah ombak basabuang dilautan
Manyumbua pulo lah ikan nan banamo Nun
Lalu bagoyanglah bumi kasaluruhannyo
Mako antah barantahlah gamponyo alam
Sabab itulah mako banamo tanah Rum

Bakato Adam jo sagalo anaknyo nan laki laki
Sangaik takajuik kito maliek anak nan bungsu
Diturunkan malekaik anak Adam nan bungsutu
Mako sampai pulo lah ka ateh bumi nan suci
Antaro nan dinamokan Pasirik jo Pasiruang
Antaro nan dinamokan Masrik jo Magrib
Antaro bukik banamo Siguntang Mahameru
Itulah nan dinamokan kini tanah Rum

Mako balakulah takadia Allah Ta'ala
Dikalukan anak Indo Jati dari sarugo
Tasabuik dinamokan Cati Reno Sudah
Salapan urang jumlah banyak kasadonyo
Sangaik rancak rancak rupo bantuaknyo
Sangaik sopan sopan bana parilakunyo
Lunak lambuik bicaronyo
Itulah nan kajadi salaku sumbangan
Untuak anak anak Adam kasaluruahannyo
Suatu pambarian hadaiah Allah Ta'ala

Mako bakumpualah anak Adam kasadonyo
Katonyo takuik kami akan tanduakmu
Wahai sudaro kami nan paliang bungsu
Mako dikareknyolah tanduaknyo tu
Sakarek manjadi Mangkuto Sanggohani
Sakarek manjadi Lambiang Lambuaro
Sakarek lai manjadi Kumalo Sati
Sakarek lai manjadi Tuduang Saji
Sakarek lai manjadi Pinang Pasie
Sakarek jadi Siriah Udang Tampowari
Tampuaknyo kuniang, gagangnyo sirah
Daunnyo digala untuak manjadi ubek
Mako dinamokan Tambago Siramin Koto

Mako diturunkanlah pulo malekaik
Nan datang dari langik nan katujuah
Untuak ma agiahnamo tanduaktu
Mako dibarilah namonyo Zulkarnain
Aratinyo mampunyoi duo ujuang dunia
Ujuang Masrib jo ujuang Magrib
Untuak rajo dibari namo Iskandar
Namo Zulkarnain dipakai jadi galanyo

Bakatolah rajo Iskandar Zulkarnain
Kapado sudaro sudarony nan banyak
Jiko baitu nan lah dikatokan malekaik
Ikuiklah apo nan dikatokannyo tu
Siapo nan ka jadi kaki tangan ambo
Siapo nan kajadi panggiriang ambo
Siapo nan ka mambawo payuang ambo
Siapo nan ka mamarentah karajaan ambo
Siapo nan ka manjalankan parentah ambo

Mako manyabuiklah sudaronyo kasadonyo
Kami nan banyakko lah nan mauruihnyo
Kasadonyo lah cukuik jo kalangkok-annyo
Sadonyo lah langkok jo kagadangannyo

Mako babarapo lamo pulo diantaronyo
Mako lauik pun suruik manyintak turun
Dijadikan Allah Ta'ala sagalo bukik
Untuak dijadikan sabagai pasak bumi

Mako rajo pun bakandak nak punyo istri
Mako datanglah parentah dari Allah Ta'ala
Jiko rajo bakandak nak punyo istri
Japuiklah anak bidodari dari sarugo

Lalu malekaik jibril turun ka dunie
Singgah langsuang taruih ka sarugo
Nampak anak bidodari sadang batanun
Mananun kain Sang Seto Kalo namonyo

Bakato malekaik Jibril pado anak bidodari
Oi Bidodari, marilah kito turun ka dunie
Karano parentah dari Allah Rabbul'alamin
Angkau akan dijadikan istri rajo didunie

Batangisan anak bidodari kasadonyo
Mako manyauiklah surang anak bidodari
Bagaimano ambo suko pai ka dunie tu
Karano ambo kiniko sadang batanun kain

Mako bakato pulo lah malekaik Jibril
Jiko engkau patuah parentah Allah
Bawoklah alat tanun engkau itu kadunie
Mako sugirolah anak bidodari bakameh kameh

Karano indak dapek saketek juo mintak janji
Diguluangnyo alaik tanunnyo jo pisau Kaciak
Dipasuntiangnyo sigulandak ditalingo suok
Mako diguguah uranglah dalam sarugo
Babagai macam alaik bunyi bunyian
Gagap gumpito azmat kadangarannyo
Mako manarilah sagalo anak bidodari

Bakato pulo Jibril kapado anak bidodari
Bao juolah sagalo alaik pakaianmu ka dunie
Supayo suko saisi dunie untuak dituladani
Bahimpunlah mareka kasadonyo ditanah Rum
Diturunkan Allah Ta'ala malekaik ampek urang
Manjadi wali jo saksi panikahan rajo tu

Hatta ateh takadia Allah Ta'ala juo
Lamolah pulo sasudah rajo dikawinkan
Dikaluakan buruang nuri dari sarugo
Buruang nuri Zamzailan ka namonyo
Walau buruang, batinnyo malekaik juo
Manantukan manusia hiduik dinagari
Kapado buruangtulah hambo Allah baguru

Mako babarapo lamo pulo sasudah tu
Mako baranak pulolah rajo tigo urang
Laki laki sajo anaknyo katigonyo
Surang banamo Sultan Maharajo alif
Surang banamo Sultan Maharajo Dipang
Surang banamo sultan Maharajo dirajo
Lamolah pulo antaronyo sasudah itu
Lalu dewasalah katigo anak itu

Mako mamandang daulaik dipatuan ka Masrik
Tantang itu kasadonyo rantau kito
Mamandang pulo baliau ka Magrib
Tantang itu kasadonyo rantau kito
Mamandang pulo baliau ka Selatan
Tantang itu kasadonyo rantau kito
Mamandang pulo baliau ka Utara
Tantang itu kasadonyo rantau kito

Mupakaiklah anak rajotu katigonyo
Ka arah mano kito handak barangkek
Lalu mamndang mereka ka arah Magrib
Mako diliek dikajauahan tabik api
Antaro ombak ombak basabuang dilautan

Mako bakahandak daulaik dipatuan handak balaie
Mako mupakaik katigonyo di Pulau Langkapuri
Antaro bukik Siguntang Mahameru dilauik Sailan
Mako tioknyo mangingini Mangkuto Sanggohani
Mako barabuik rabuiklah antaro mereka katigonyo

Mako jatuahlah Mangkuto masuak kadalam lauik
Mako dibueklah sabuah limbago cambul kaco
Mako disuruahlah kapado Cati Bilang Pandai
Mako nampaklah Mangkuto didalam lauik
Kalihatan Mangkuto sadang dipaluak ula bidai

Babaliak Cati Bilang Pandai kadalam perahu
Nampak katigo daulaik dipatuan sadang lalok
Mako bapikialah pulo Cati Bilang Pandai
Dilieknyuo ado tasadio ameh sajatah jati
Dipabueknyo tiruan Mangkuto sanggohani
Mangkuto Sanggohani sudah tukang dibunuah
Indak mungkin lah kadapek ditiru lai
Cati Bilang Pandai masuak ka parahu
Didapatinyo surang daulaik dipatuan jago
Inyolah nan banamo Sultan Sri Maharajo Dirajo
Nan maambiak mangkuto tu
Jatuah jadi miliknyo

Mako sangaik heranlah rajo nan baduo
Marentak balaie Sultan Maharojo dipang
Inyolah nan taruih sampai ka banua Cino
Kudo ameh disabuikkan namo karajaannyo
Bajajaran lawehnyo sampai taruih ka utaro

Surang nan banamo Sultan Maharajo Alif
Babaliak kumbali pulang ka tanah Rum
Mamarentah Turki, Parancih, Ulando, Inggirih
Manguasoi bagian baraik dunie lalu ka utaro

Mako balaielah Sultan Maharjo Dirajo
Dapeklah manggunokan parahu kayu jati
Anam baleh urang kasadonyo pangiriangnyo
Ikuik dalam rombongan limo istri rajo

Surang istri rajo disabuik anak Rajo
Lakunyo mardeso, sopan suko mamiliah
Ado istri rajo disabuk anjiang Mualim
Lakunyo suko mamintak jo pambirunguik
Ado istri rajo disabuik kuciang Siam
Lakunyo suko manjamua diri, mandakek-I rajo
Surang istri rajo disabuik Harimau Campo
Lakunyo ganeh pamberang walaupun ka rajo
Surang istri rajo disabuik Kambiang Utan
Lakunyo suko baulam jo makan siriah

Mako balaielah sampai kapulau ujuang ameh
Parahunyo pacah karano tasakek dibukik karang
Mupakaik rombongan, dek takuik pado titah rajo
Bapikie Cati Bilang Pandai mamelok-I parahu tu
Manitiah daulaik dipatuan kapado sa isi parahu
Jiko kamu pelok-I parahu tu sabagai samulo
Akan aku ambiak kalian ka jadi minantu

Sukolah sagalo urang nan baraka di parahu
Dipelok-I parahu tu sabagai suruik samulo
Mako sangaiklah heran rajo daulaik dipatuan
Mako balaielah rajo manuju pulau Jawi
Lalu babaliak ka gunuang Marapi sandirinyo

Sasungguahnyo Allah sangaik kasiah kapado rajo
Istri rajo pun malahiakan limo anak padusi
Istri, Anak Rajo malahiekan surang anak
Istri, Anjiang Mualim malahiekan surang anak
Istri, Kuciang Siam malahiekan surang anak
Istri, Harimau Campo malahiekan surang anak
Istri, Kambiang utan malahiekan surang anak

Mako lamo pulo antaronyo sasudah itu
Cukuiklah umue anak padusi kalimonyo
Lalu dikawinkan pulo jo limo laki laki
Nan mamelok-I parahu sasuai jo janji rajo

Mako lamolah antaronyo sasudah kawin
Sabulan duo sampai ampek bulan lamonyo
Batanyo rajo kapado sagalo minantunyo
Apobilo ado angkau sapamakanan jo sapaminuman
Adolah nan kadisabuik, untuak ditanyokan
Lalu manyabuik kasado minantu nan balimo
Babagai jawek mereka indak ado nan sarupo
Hanyo surang sajo nan sapamakan sapaminuman
Mako rajo bapike, taraso babagia dihatinyo

Mako lamo pulo antaronyo sasudah itu
Mako lauik pun susuik manyintak turun
Ditumbuahkan Allah Ta'ala rumbio rumbionyo
Tigo jurai banyaknyo diateh gunuang
Sajurai ma arah ka ranah Tanah Data
Sajurai maarah ka ranah Lubuak Agam
Sajurai ma arak ka ranah Limo Puluah Koto

Disuruah anak minantui nan balimo tadi
Surang ka Ranah Tanah Data iyolah anak Anak Rajo
Surang ka Lubuak Agam iyolah anak Harimau Campo
Surang ka Limo Puluah Koto iyolah anak Kambiang Utan
Surang ka Canduang Koto Laweh anak Kuciang siam
Surang Ka Kubang iyolah anak Anjiang Mualim

Mako bagurulah rajo kito kapado sagalo alam
Mako mandapek Galundi nan Baselo namonyo
Iyolah nan turun ka arah Ranah Tanah Data
Balun Lahie induak Katumangguangan
Jo adiaknyo Parpatiah Nan Sabatang

Mako lamo pulo antaronyo
Mako kambanglah sagalo anak rajo tadi

Disadur dari buku "Kato Pusako"
(disadur oleh Dewis Natra 2 November 2004)

Sumber : http://www.cimbuak.net